Vese emb granda jòia tornar espelir las flors d’acàcia. L’acàcia es pas un aubre rare chas nos. A l’encontrari. I nais coma tranuja, e daus còps voldriam ben nos desbarrassar d’aqueu bòsc que fissa e que ganha tant viste. E puei, un matin, una sentor rara nos ditz que las grapas de flors blanchas son espelidas. E òm se sent, tot d’un còp, un pauc sadol, coma una abelha.

Quò es lo moment de far lo dessert lo mai rare e lo mai preciós de tota l’annada : los bunhets de flors d’acàcia. Las fau ‘massar jòunas enquera, plaser de l’uelh e dau nas. Las trempar dins una pasta de crespa un pauc espessa mas pro clara tot-parier per que la flor garde sa fòrma. Fau que l’òli bulissa. Fasetz daurar. Minjar de las flors, se nuirir de beutat e de sentor, es quò pas se tornar trobar au paradís d’autres còps ?

Micheu CHAPDUELH, « Acàcia », Un temps per viure, IEO, 1997

Traduction (par Maxime)

 Je vois avec grand plaisir éclore les fleurs d’acacias. L’acacia n’est pas un arbre rare chez nous. Au contraire. Il pousse comme du chiendent, et des fois nous voudrions bien nous débarrasser de ce bois qui pique et qui se répand si vite. Et puis, un matin, un parfum rare nous dit que les grappes de fleurs blanches ont éclos. Et on se sent, tout d’un coup, un peu saoul, comme une abeille.

C’est le moment de faire le dessert le plus rare et le plus précieux de toute l’année : les beignets de fleurs d’acacia. Il faut les ramasser jeunes encore, plaisir des yeux et du nez. Les tremper dans une pâte à crêpe un peu épaisse mais assez claire quand même pour que la fleur garde sa forme. Il faut que l’huile bouille. Faites dorer. Manger des fleurs, se nourrir de beauté et de senteur, n’est-ce pas se retrouver au paradis d’autrefois ?